بما ان النهارده عيد ميلادي
اه فعلا النهارده عيد ميلادي ال22
احم احم انتم عارفين بحكم اني مشهور دلوقتي مينفعش اقول عمري علي العام كدا
المهم
حبيت اشرحلكم لية عمرو دياب بيصغر واحنا بنكبر
يعني مثلا لو جالنا كائن فضائي وعرضنا عليه الصورتين الي قدام حضرتكم دول
مستحيل هيتخيل ان عمرو دياب اكبر مني
حاجة يعني بسم الله مشالله غريبة وعجيبة الحقيقة
------------------------------------
الناس كلها تبص في صور عمرو دياب
ويقولوا شوفوا بيصغر ازاي !!
شوفوا دا منظر واحد عنده 60 سنة
دا بيعمل بوتوكس دا بيشرب اوكسجين ...
لا ياعم دة بيضرب حقن
لا ابدا دة بيشرب ماية معدنية
و هكذا من القر اللي مالوش نهاية
...
الحقيقة ان الهضبة لا كبر ولا صغر ولا اي حاجة
وشكله طبيعي جدا بالنسبة للحياة اللي هو عايشها
_الهضبة مش بيشتغل مندوب مبيعات
وبيقعد يلف على العملا طول النهار
مع احترامي الكامل لمندوبي المبيعات
_ولا حتى موظف في مصلحة حكومية
شعره وقع من كتر الحسابات والعهدة
مع احترامي الكامل لموظفي المصالح الحكومية
_الهضبة معندوش مدير غبي ورخم
قارفه في عيشته وعيشة الي خلفوة
وبيخليه يفكر بالأنتحار كل ربع ساعة
مع احترامي الكامل للمديرين
_الهضبة مش متجوز مدام هناء الموظفة
اللي طول النهار
تقوله البيضة بقت بجنيه ونص ياعمرو
والعيال هتجوع يا هضبة
واقساط الجمعيه
والحوافظ لسة منزلتش ياعمور
مع احترامي الكامل لمدام هناء الموظفة
_الهضبة مبيروحش بعد يوم 14 ساعة شغل
يضرب طاجن البامية وينام
مع احترامي الكامل لطاجن البامية
_لو حصل واتصل بمراته وهو في الشغل
مبتقولوش هات بامبرز وفينو وانت راجع
_وطبعا ما بياخدش الزبالة وهو نازل
وطبعا احترامي للمتزوجين وربنا يكون في عونكم
الهضبة
مش بيقعد على القهوة
يفكر هيجيب فلوس مدارس العيال منين
مرتبه ما بيخلصش يوم 15
ويقعد يفكر هيعدي باقي الشهر ازاي
مع احترامي الكامل للمرتب الشهري
_ولا بيصحي من النوم مفزوع
وينزل جري على ملا وشه عشان يلحق يمضي
ولا بيقعد طول اليوم وكل يوم يفكر ازاي يسدد ديونه
مع احترامي الكامل للمديونين
الهضبة مش قاعد مستني حضرتك
تعمل اشتراك في قناتة
زي حلاتي مثلا
ولا تكتبلة كومنت حلو
مع احترامي الكامل لكل الي مشتركين والغير مشتركين في القناة طبعا
لكن الحقيقة ان
الهضبة بيشتغل شغلانة بيحبها
يتجوز او يطلق بيعمل الحاجة الي تريحه
مش الي مفروضة عليه من المجتمع والعيلة والظروف
_الهضبة في اجازاته
بيروح جزر واماكن حلوة تفتح النفس
كل سنة لازم يكون يروح اوروبا وامريكا يغير جو
بيقعد في اماكن راقية وهدوء واستجمام
شغال مع ناس تحسهم بيستحمو كل خمس دقايق
هو مدير نفسة ولا حد يقولة هخصملك ولا حد يقولة هرفدك
ودا في حد ذاته يخليه يرجع طفل صغير من السعادة
والي اهم من كل دة
ان امكانياته المادية تؤهله انه يعمل كل دة
الهضبة مش بيصغر ولا بيكبر احنا اللي عيشتنا مرار
😂😂 يالا الحمد لله 🙏🙏🙏
وشكرا مقدما لكل الي دخل يهنيني بمناسبة عيد ميلادي
وسلااام عليكم
تعليقات
إرسال تعليق